पोखरा, कास्की – नेपाल रेडक्रस सोसाइटी कास्की शाखाको आयोजनामा प्रादेशिक रक्त सञ्चार सेवा केन्द्र पोखराको अनुगमन कार्यक्रम सम्पन्न भएको छ। गण्डकी प्रदेशका स्वास्थ्य मन्त्री कृष्ण प्रसाद पाठक को नेतृत्वमा सम्पन्न अनुगमन कार्यक्रममा रक्त सञ्चार केन्द्रका गतिविधि, सेवा, चुनौती तथा आगामी योजनाबारे जानकारी गराइएको थियो।

नेपाल रेडक्रस सोसाइटी कास्की शाखाका सभापति डण्डराज शर्मा को अध्यक्षतामा सम्पन्न कार्यक्रममा शाखाका कोषाध्यक्ष सन्तोष अधिकारी ले स्वागत मन्तव्य दिनुभएको थियो। कार्यक्रममा रक्त सञ्चार केन्द्रका प्रमुख अर्जुन ज्ञवाली ले केन्द्रका सेवा, चुनौती र आगामी योजना बारे जानकारी गराउँदै सेवा प्रवाहलाई अझ प्रभावकारी बनाउन आवश्यक पहलबारे चर्चा गर्नुभयो।

कार्यक्रमको सञ्चालन नेपाल रेडक्रस सोसाइटी जिल्ला शाखा कास्कीकी कार्यवाहक मन्त्री रमा कोइराला न्यौपाने ले गर्नुभएको थियो। सभापति शर्माले धन्यवाद ज्ञापन गर्दै रक्त सञ्चार केन्द्रको प्रभावकारी सेवा प्रवाहका लागि सबै पक्षको सहकार्य आवश्यक रहेको बताउनुभयो।

यसैक्रममा, गण्डकी प्रदेशका स्वास्थ्य मन्त्री कृष्ण प्रसाद पाठक ले पोखरामा ए-लेबलको एम्बुलेन्स चाँडै सञ्चालन गर्ने तयारी भइरहेको जानकारी दिनुभयो। मन्त्रालयको आवश्यक सहयोग उपलब्ध गराउने प्रतिबद्धता व्यक्त गर्दै मन्त्री पाठकले स्वास्थ्य सेवामा सुधारका लागि निरन्तर प्रयास जारी राख्ने उल्लेख गर्नुभयो।