पोखरा, १७ फागुन – नेपाल रेडक्रस सोसाइटी पोखरा-१७ उपशाखाको आयोजनामा स्थानीय विद्यालयका विद्यार्थीहरूलाई लक्षित गरी रेडक्रस अभिमुखीकरण कार्यक्रम सम्पन्न भएको छ।

कार्यक्रम पोखरा महानगरपालिका वडा नम्बर १७ का वडा अध्यक्ष राधिका कुमारी शाही योगि ज्युको  प्रमुख आतिथ्यतामा तथा उपशाखाका सभापति हरि प्रसाद श्रेष्ठको सभापतित्वमा सम्पन्न भएको थियो। कार्यक्रममा कास्की शाखाका उपसभापति उर्मिला खड्का, कास्की शाखाका सदस्य एवं जुनियर युवा समितिका संयोजक रमेशराज भण्डारीको विशेष उपस्थिति रहेको थियो।

उक्त अभिमुखीकरण कार्यक्रममा ११ वटा विद्यालयका ६० जना विद्यार्थीहरूले सहभागिता जनाएका थिए। सहभागी विद्यार्थीहरूलाई रेडक्रसका विभिन्न कार्यक्रम, उद्देश्यता, मानवीय सेवा तथा आपतकालीन अवस्थामा अपनाउनु पर्ने उपायहरूबारे जानकारी प्रदान गरिएको थियो।

कार्यक्रमको सहजीकरण जिल्ला शाखाका प्रशिक्षक तथा लेखा अधिकृत गणेशप्रसाद कोइराला र नवराज भण्डारीले गर्नुभएको थियो। कार्यक्रममा रेडक्रसका आधारभूत सिद्धान्तहरू, प्राथमिक उपचार, विपद् व्यवस्थापन तथा स्वयम्सेवा संस्कृतिका बारेमा विद्यार्थीहरूलाई प्रशिक्षण दिइएको थियो।

कार्यक्रमको सञ्चालन उपशाखा सचिवज्यूले गर्नुभएको थियो। अभिमुखीकरण कार्यक्रमले विद्यार्थीहरूमा रेडक्रसको भूमिका, मानवीय सेवा तथा सामाजिक उत्तरदायित्वबारे सचेतना बढाएको आयोजकले जनाएको छ।